Акцыя салідарнасьці ў Варшаве
17 октября 2005

Учора ў некалькіх польскіх гарадах прайшлі акцыі салідарнасьці з сем’ямі зьніклых беларускіх палітыкаў сем’ямі палітвязьняў і ўсімі, хто змагаецца за дэмакратыю ў Беларусі.


Каля сотні ў асноўным маладых людзей прыйшлі на вуліцу Новы сьвят — гэта ў самым цэнтры Варшавы. Прысутныя трымалі бела-чырвона-белыя сьцягі, транспарант з надпісамі »Мы салідарныя зь Беларусьсю». Удзельнікі акцыі выцягнуліся ў жывы ланцуг ўздоўж «Новага сьвяту», трымаючы сьвечкі белага і чырвонага колераў.

Вось што сказаў нашаму радыё Антось Цялежнікаў — адзін з кіраўнікоў Зьвязу на карысьць дэмакратыі ў Беларусі — арганізацыі, якая наладзіла акцыю ў Варшаве.

(Цялежнікаў: ) «Як вы бачыце, тут сёньня большасьць моладзі, студэнтаў, якія яшчэ год таму бралі ўдзел у акцыях у падтрымку украінскай рэвалюцыі. Я спадзяюся, што нашыя акцыі, нашыя захады прынясуць вынік, падобны да ўкраінскага. Сьвечка -, гэта сымбаль надзеі, сымбаль надзеі на вольную, дэмакратычную Беларусь».

Большасьць удзельнікаў учорашняй акцыі — гэта маладыя палякі. Я запытаўся ў варшаўскай студэнткі Караліны, чаму яна вырашыла ўзяць удзел у жывым ланцугу салідарнасьці зь Беларусьсью.

(Караліна: ) «Я ўжо амаль пяць гадоў падтрымліваю беларускую апазыцыю, і калі адбываюцца нейкія беларускія акцыі, дэманстрацыі, дык лічу патрэбным і важным узяць у іх удзел».

Пастаяўшы пэўны час у ланцугу са сьвечкамі, удзельнікі акцыі зь беларускімі нацыянальнымі сьцягамі накіраваліся ў бок старога гораду, дзе адбываўся ўрачысты канцэрт з нагоды Дня Папы — сьвята, якое адзначаецца ў дзень нараджэньня Яна Паўла ІІ. Там, каля касьцёла сьвятой Ганны, які наведваў Папа ў часе адной са сваіх пілігрымак на радзіму, сьвечкі былі выстаўленыя ў тры паласы — белую, чырвоную і белую.

Падобныя акцыі ў той самы час адбыліся ў Беластоку, Лодзі, Гдыні і Ўроцлаве.


Аляксей Дзікавіцкі
«Радыё Свабода»