У панядзелак 16 кастрычніка акцыі салідарнасьці
з беларускімі палітвязьнямі і сем’ямі зьніклых палітыкаў
адбыліся ў Варшаве. Каля пяцідзесяці беларускіх студэнтаў
прыйшлі да беларускай амбасады і паставілі сьвечкі салідарнасьці,
патрабуючы неадкладнага вызваленьня палітычных вязьняў.
Некалькі дзясяткаў беларускіх студэнтаў пікетавалі беларускае
консульства ў Беластоку, трымаючы ў рукох зьнічы й партрэты
зьніклых і арыштаваных.
Сёньняшнія акцыі салідарнасьці былі прысьвечаны беспрэцэдэнтнаму
перасьледу маладых беларускіх палітыкаў — лідэра Маладога
Фронту Зьмітра Дашкевіча, які ўжо больш месяцу знаходзіцца
ў менскім сьледчым ізалятары, і 22-гадовага жодзінскага
маладафронтаўца Паўла Красоўскага, якога пракуратура падазрае
па жудасных артыкулах — згваўтаваньні, масавых забойствах
і тэрарызме.
Падчас акцыяў беларускія студэнты не пакінулі без увагі
й незаконнае закрыцьцё менскай пратэстанцкай царквы «Новае
Жыцьцё». Яны выказалі падрымку і салідарнасьць з вернікамі,
якія ўдзельнічаюць у самай масавай у гісторыі незалежнай
Беларусь галадоўцы.
Гаворыць арганізатар акцыі каля беларускага консульства
ў Беластоку, маладафронтавец Барыс Гарэцкі: «Мы тут, каб
выказаць свой рашучы пратэст супраць беззаконьня і гвалту,
які чыніць дыктатарскі рэжым Лукашэнкі ў нашае краіне. Мы
не жадаем, каб нашыя нашчадкі жылі пры таталітарным строі,
баяліся адкрыта выказваваць свае думкі ці займацца кіраваньнем
сваёй дзяржаваю. Мы падкрэсьліваем, што Лукашэнка зьяўляецца
апошнім крывавым дыктатарам ў дэмакратычнай Эўропе, і мы
зробім усё магчымае, каб найхутчый спыніць ягонае беззаконнае
панаваньне ў нашай краіне. Мы верым, што ў самым бліжэйшым
часе менавіта мы будзем кіраваць сваёй Бацькаўшчынай, і
таму зараз мусім змагацца за свабоду і дэмакратыю на Беларусі.
Свабоду палітвязьням! Жыве Беларусь!»
Арганізатар акцыі каля беларускай амбасады ў Варшаве, маладафронтавец
Сяржук Марчык: «Нажаль зараз мы не маем магчымасьці атрымліваць
вышэйшую адукацыю ў сваёй краіне. Але нават знаходзячыся
ў Польшчы мы не можам забыць пра сваіх арыштаваных сяброў
— герояў, разам з якімі вясною стаялі на Кастрычніцкай
плошчы, дамагаючыся праўды й справядлівасьці. Зараз яны
сядзяць у беларускіх турмах, таму мы выказваем салідарнасьць
з імі і патрабуем: Свабоду палітвязьням!»
Хартия-97
|
